Մոսկվայի Պրեսնենսկի շրջանային դատարանը վեց ամսով երկարաձգել է ձեռնարկատեր և բլոգեր Ալեգ Շչեպիխինի կալանքը, հաղորդում է «Коммерсантъ»-ը։
Նա մեղադրվում է հավատացյալների զգացմունքները վիրավորելու, ինչպես նաև սեռի, ռասայի կամ ազգային պատկանելության հատկանիշներով ատելություն հրահրելու մեջ։
Դատարանում մեղադրողը հայտարարել է, որ խափանման միջոցը փոխելու հիմքերը չեն վերացել։ Բլոգերը խնդրել է իրեն տնային կալանքի տակ պահել կամ գրավի դիմաց ազատ արձակել։
Դատավարության ժամանակ Շչեպիխինը հայտարարել է, որ կրոնի ազատության իրավունքի (ՌԴ Քրեական օրենսգրքի 148-րդ հոդված) խախտման դրվագը խոստովանել է քննիչի ճնշման տակ։
Խիմկիի գործարար Արեգ Շչեպիխինը հունիսի 3-ի երեկոյան առևանգվել է Մոսկվայի Յարոսլավսկի երկաթուղային կայարանի հրապարակից։ Մի քանի մարդ բռնել է նրան և խցկել սև, թարթող լույսերով Mercedes-ի բեռնախցիկը։ Մոսկվայի ոստիկանությունը ձերբակալել է ինչպես առևանգման մասնակիցներին, այնպես էլ Շչեպիխինին։ Հունիսի 4-ին հաղորդվել է, որ գործարարն ազատ է արձակվել «Կրեմլի հրամանով», սակայն հունիսի 6-ին դատարանը կալանավորել է նրան։
Չեչնիայի ազգային քաղաքականության, արտաքին հարաբերությունների, մամուլի և տեղեկատվության նախարար Ահմեդ Դուդաևը հայտարարել է, որ Շչեպիխինը, որը տեսանյութ է նկարահանել չեչեն ժողովրդին, Ալլահին և Ղուրանին վիրավորող բառերով, «չի առևանգվել, այլ ձերբակալվել է իրավապահ մարմինների աշխատակիցների կողմից»։
«ВЧК-ОГПУ» թելեգրամյան ալիքը հրապարակել է ձայնային հաղորդագրություններ, ըստ որոնց՝ առևանգմանը մասնակցել են Պետդումայի պատգամավոր Ադամ Դելիմխանովի շրջապատի մարդիկ։
