Երևանում կայացավ Ապրելակերպի բժշկության ասոցիացիայի առաջին հանդիպումը:
«Ավելի շատ քայլեք, առողջ սնվեք, լավ քնեք, հրաժարվեք վնասակար սովորույթներից»․ այս խորհուրդները վաղուց դարձել են առողջության մասին ցանկացած զրույցի անբաժանելի մասը։ Սակայն իրական կյանքում մարդկանց մեծ մասը դժվարությամբ է դրանք վերածում կայուն սովորությունների։
Հենց այս բացն է փորձում լրացնել ապրելակերպի բժշկությունը (Lifestyle Medicine)՝ բժշկության համեմատաբար նոր ուղղությունը, որն արդեն լայնորեն զարգանում է աշխարհի բազմաթիվ երկրներում։ Հուլիսին Երևանում կայացավ Հայաստանի Ապրելակերպի բժշկության ասոցիացիայի առաջին մասնագիտական հանդիպումը, որը համախմբեց տարբեր ոլորտների բժիշկների և առողջապահական փորձագետների։
Ասոցիացիայի Նախագահ, Աստղիկ ԲԿ-ի Կրծքագեղձի և վիրաբուժական ուռուցքաբանության ծառայության ղեկավար Գևորգ Ասլիբեկյանի խոսքով, բժշկությունն այսօր հաճախ զբաղվում է արդեն ձևավորված հիվանդությունների բուժմամբ, մինչդեռ բազմաթիվ դեպքերում հնարավոր է ազդել հիվանդության առաջացման կամ ընթացքի վրա՝ փոխելով մարդու առօրյա վարքագիծը։
