Բելառուսի նախագահ Ալեքսանդր Լուկաշենկոն հայտարարել է՝ նրանք, ովքեր լավ չեն կատարում իրենց աշխատանքային պարտականությունները գյուղատնտեսության ոլորտում, խախտում են աշխատանքային կարգապահությունը հատկապես բերքահավաքի ժամանակ, պետք է գնան բանակ՝ ծառայելու։ Հայտարարությունը Լուկաշենկոն հնչեցրել է խորհրդակցության ժամանակ, որը հրավիրվել է գյուղատնտեսության ոլորտի, մասնավորապես՝ բերքահավաքի հետ կապված խնդիրները քննարկելու նպատակով։
«Ասեք Խրենինին (Բելառուսի պաշտպանության նախարարն է-խմբ․), որ նրանց, ովքեր աշխատել չգիտեն, զորակոչի բանակ՝ հարավային սահման՝ անտառ»,- ասել է Լուկաշենկոն՝ մանրամասնելով, որ նկատի ունի այն տարածքները, որտեղ այժմ հատուկ ռազմական գործողությունն է ընթանում։
Բելառուսի նախագահը միևնույն ժամանակ նշել է, որ իրենք ոչ մեկի դեմ «ռազմական հարձակում ձեռնարկելու մտադրություն» չունեն։
«Մենք ոչ մեկի վրա չենք հարձակվում, ապահովում ենք մեր անվտանգությունը»,- ասել է Լուկաշենկոն։
Նա նաև հայտարարել է, որ իրենց աշխատանքային պարտականություններում թերացող պաշտոնյաներն էլ պետք է պատասխանատվություն կրեն․ ով թերանում է, նրան պետք է ուղարկել դաշտ՝ տրակտոր, կոմբայն քշելու, աշխատելու։
