Սաուդյան Արաբիայի փաստացի առաջնորդ, արքայազն Մոհամմեդ բին Սալմանը նախագահ Թրամփին դրդել է շարունակել պատերազմն Իրանի դեմ՝ պնդելով, որ ամերիկա-իսրայելական ռազմական արշավը պատմական հնարավորություն է Մերձավոր Արևելքը վերաձևավորելու համար։ Այս մասին հայտնում է The New York Times-ը։
Անցյալ շաբաթ տեղի ունեցած մի շարք խոսակցությունների ընթացքում արքայազն Մոհամմեդը Թրամփին փոխանցել է, որ նա պետք է ձգտի Իրանի կոշտ գծի կողմնակից կառավարության կործանմանը, հայտնել են քննարկումներին ծանոթ աղբյուրները։
Ըստ նույն աղբյուրների՝ արքայազն Մոհամմեդը պնդել է, որ Իրանը երկարաժամկետ սպառնալիք է Պարսից ծոցի համար, որը կարող է վերացվել միայն գործող կառավարությունից ազատվելու միջոցով։
Իսրայելի վարչապետ Բենիամին Նեթանյահուն նույնպես Իրանը դիտարկում է որպես երկարաժամկետ սպառնալիք, սակայն վերլուծաբաններն ասում են, որ իսրայելցի պաշտոնյաները, հավանաբար, որպես հաղթանակ կդիտարկեն Իրանի ձախողված պետություն դառնալը, որն այնքան կլանված կլինի ներքին անկարգություններով, որ չի կարողանա սպառնալ Իսրայելին։ Մինչդեռ Սաուդյան Արաբիան Իրանի պետականության տապալումը համարում է լուրջ և ուղղակի անվտանգային սպառնալիք իր համար։
Այդուհանդերձ, թե՛ սաուդյան, թե՛ ամերիկյան կառավարությունների բարձրաստիճան պաշտոնյաները մտահոգված են, որ հակամարտության ձգձգման դեպքում Իրանը կարող է էլ ավելի կործանարար հարվածներ հասցնել Սաուդյան Արաբիայի նավթային օբյեկտներին, իսկ Միացյալ Նահանգները կարող է խրվել անվերջանալի պատերազմի մեջ։
Հրապարակայնորեն Թրամփը տատանվում է երկու ծայրահեղությունների միջև՝ մեկ ակնարկելով, որ պատերազմը կարող է շուտով ավարտվել, մեկ ազդարարելով դրա էսկալացիայի մասին։ Երկուշաբթի օրը նախագահը սոցիալական ցանցերում գրել էր, որ իր վարչակազմը և Իրանը արդյունավետ զրույցներ են ունեցել թշնամանքի լիակատար և վերջնական կարգավորման վերաբերյալ, թեև Իրանը հերքել է այն տեսակետը, որ բանակցություններն ընթացքի մեջ են։
