«Օրը 20-30 կապ ծաղիկ հազիվ ենք վաճառում, մնացածը փչանում է, թափում ենք։ Հիմա ինքնարժեքից ցածր ենք վաճառում ծաղիկները»։ Այս մասին NEWS.am–ի թղթակցի հետ զրույցում ասաց Էջմիածին–Երևան ճանապարհին բողոքի ակցիա իրականացնող ծաղկավաճառներից մեկը՝ նշելով, որ ծաղիկը սեփական ջերմոցում է աճեցնում։
Ծաղկեվաճառը նշեց, որ վերջին շրջանում ստեղծված իրավիճակով պայմանավորված, ֆինանսական լուրջ վնասներ է կրել։
«Եթե ամբողջ ջերմոցի ծաղիկները չկարողանանք վաճառել, 1.5 մլն դրամի վնաս կկրենք»,–հավելեց նա։
Նշենք, որ վերջին օրերին Էջմիածին քաղաքի Զվարթնող գյուղի ծաղկեգործները բողոքի ակցիա էին անում։ Նրանք բողոքում են, որ չեն կարողանում իրենց ծաղիկներն արտահանել Ռուսաստան։ Ռուսաստանի «Ռոսսելխոզնադզոր» դաշնային ծառայությունը հայտնել էր, որ մտադիր է 2025-ի հունիսի 16-ից ժամանակավոր արգելք սահմանել Հայաստանից Ռուսաստան ծաղիկների ներմուծման վրա։ Ծառայությունից հայտնել են, որ այս որոշումը պայմանավորված է Հայաստանից մատակարարվող ծաղիկների մեջ բարձր բուսասանիտարական ռիսկ ունեցող կարանտինային վնասատուների բազմակի հայտնաբերմամբ։
Այսօր տնտեսավարողներին ընդունել է ՍԱՏՄ ղեկավար Տիգրան Պետրոսյանը։ Նա նշել է, որ հայկական ծաղիկները Ռուսաստանում ընդունել է կեղծ ընկերություն եւ հարկերից խուսափել է։ Նրա խոսքով, հիմա դա բացահայտվել է եւ ռուսական կողմը խստացրել է պյմանները։ ՍԱՏՄ–ն ռուսական կողմի հետ եկել է համաձայնության, որ ՍԱՏՄ–ի երաշխավորությամբ կկատարվի ստուգում եւ եթե ծաղիկները վարակված չլինեն, նոր միայն կստանան սերտիֆիկատ:
