«Հայաստանի էլեկտրական ցանցեր» ՓԲԸ-ում վերջին իրադարձություններից հետո թեև հարաբերական անդորր է, բայց աշխատակիցները նստած սպասում են՝ երբ են իրենց հետևից գալու։ Այսինքն՝ երբ են գալու, որ վերջնական խլեն ՀԷՑ-ը։ 

ՀԷՑ տնօրենի ժամանակավոր պաշտոնակատար Դավիթ Ղազինյանը MediaHub-ի հետ զրույցում ասաց, որ ՀԷՑ-ն իր բնականոն հունով աշխատում է՝ հետևելով մամուլին, իհարկե, քանի որ որևիցե կոնտակտ չկա ենթադրյալ «խլողների» հետ։

«Որևիցե կոնտակտ չկա, որևիցե ինֆորմացիա չունենք, մամուլին հետևելով, որ տեսնենք՝ ինչ կլինի, բնականոն աշխատում ենք»,-ասաց Դավիթ Ղազինյանը։

-Այսինքն՝ էն մեր նախկին նախագահի նման նստած՝ մամուլին եք հետևում, որ տեսնեք, թե ե՞րբ են գալու ձեր հետևից։ 

-Ի՞նչ անենք։ Բայց, ի տարբերություն նախկին նախագահի, նա երևի ուներ իրենց հետ կոմունիկացվելու եզրեր, մենք չունենք, ոչ ոք մեզ հետ ոչ քննարկում է, ոչ ծանուցում է, ոչ մի նման բան չկա։ 

-Բայց ի՞նչ պետք է անեն, կարծում եք՝ հատուկ ջոկատայիններով կգա՞ն նորից ՀԷՑ-ի վրա, որ ձեզ այնտեղից ուժով դուրս հանեն և ՀԷՑ-ը խլեն ձեր ձեռքից։ Պետք է ինչ-որ իրավական ընթացակարգ լինի, չէ՞, դրա համար, օրինակ՝ ՀԾԿՀ-ն վարույթ հարուցի ՀԷՑ-ի դեմ։ 

-Դե, պարզ է, բայց ես չեմ կարծում, որ իրենք էդպիսի քայլ կանեն՝ հաշվի առնելով, որ մենք էստեղ չենք բարիկադավորվել և սպասում իրենց։ Էդ, որ ասում եք՝ հատուկ ջոկատայինները գան, չգիտեմ՝ ինչ անեն, մենք բարիկադներ չենք կառուցել, որ իրենք էլ ջոկատով գան։ Մենք մեր հունով աշխատում ենք, կգան, փաստաթղթավորված ցույց կտան, կտեսնենք՝ ինչի մասին է խոսքը, մենք կենթարկվենք օրենսդրությանն ու օրենքին, որովհետև, ինչպես նշել եմ շատ անգամներ, սեփականատերը պետականամետ է, և էդպիսի խնդիր չկա դրած՝ չենթարկվելու։ Կենթարկվենք, կհասկանանք՝ իրենց ուզածն ինչ է, եթե շահերը համընկնում են, իսկ ես ուզում եմ հավատալ, որ շահերը համընկնում են, ապա կփորձենք աշխատել մինչև այս թնջուկի իրավական լուծումը, որովհետև ևս մեկ անգամ հայտարարում եմ, որ ապօրինի է այս գործընթացը և ապագա չունի։ 

-Բայց իրավական առումով ՀԾԿՀ-ն պետք է ինչ-որ բանից դժգոհ լինի, վարույթ հարուցի, և նոր օրենքով արդեն հնարավորություն ունի որպես պատժամիջոց՝ կառավարիչ փոխելու, որից հետո գան կառավարչին փոխեն։

-Տեսեք, մինչև էս վերջին օրենսդրական փոփոխությունները ՀԾԿՀ-ն ունեցել է էդպիսի հնարավորություն վարույթ հարուցելու և պատժամիջոցներ կիրառելու, և կիրառել է, բայց էս գործիքը, որ տվել են՝ կառավարիչ նշանակել և այլն, էդպիսի բան չի եղել։ Ես այս պրոցեսն եմ համարում հակաօրինական։ Թե չէ պետությունն անպայման պետք է անկախ հանձնաժողովի միջոցով վերահսկողություն սահմաներ, ինչը և արել է։ 

-Իսկ ի՞նչ տարբերություն՝ պատժամիջոցը կիրառել են, օրինակ, տուգանքի՞ տեսքով, թե՞ կառավարիչ փոխելու, եթե օրենքն արդեն այդպիսի հնարավորություն տալիս է։ 

-Դե, գիտե՞ք ինչ, եթե էդպես նայենք, ընդհանուր կյանքի բոլոր ոլորտների վրա կարող ենք նայել էդպես, ասենք՝ մեքենայով խախտում անես, գան մեքենադ վերցնեն ձեռքիցդ։ Այսինքն՝ սա նախադեպային առումով շատ վատ նախադեպ է։ Գիտե՞ք, ընդհանրապես շատ դժվար է մեկնաբանել չմեկնաբանվողը։ 

Վահե Մակարյան