Իրանի Իսլամական հեղափոխության պահապանների կորպուսը (ԻՀՊԿ) հայտարարել է, որ «Իրական խոստում III» գործողության ընթացքում արձակված հրթիռները հարվածել են իսրայելական ավիաբազաներին, որոնք օգտագործվել են որպես մեկնարկային հարթակներ Իրանի վրա հարձակումների համար, հաղորդում է Tasnim-ը։
«Իրական խոստում III» գործողությունը մեկնարկել է ուրբաթ երեկոյան՝ ի պատասխան Իսրայելի կողմից Իրանի վրա օրվա սկզբին կատարված հարձակումների։
«Այս գործողության ընթացքում ԻՀՊԿ-ի ավիատիեզերական ուժերի հրթիռային և անօդաչու թռչող սարքերի ստորաբաժանումները օգտագործել են բարձր ճշգրտության և ինտելեկտուալ հրթիռային համակարգերի համադրություն՝ հարվածելու ռազմական կենտրոններին, մեր երկրի դեմ հանցավոր ագրեսիայի համար նախատեսված մեկնարկային հարթակներ հանդիսացող ավիաբազաներին, ինչպես նաև բանակի համար հրթիռներ և այլ զենքեր արտադրելու համար օգտագործվող ռազմաարդյունաբերական օբյեկտներին։
Սիոնիստական ռեժիմի բանակը հանցագործություններ է կատարել տարածաշրջանի դիմադրող ժողովուրդների, մասնավորապես՝ Պաղեստինի և Ղազայի ճնշված ժողովուրդների դեմ։ Այս թիրախները, ինչպես նաև օկուպացված տարածքների խորքում գտնվող այլ ռազմական թիրախներ, հաջողությամբ հարվածվել են», - ասվում է ԻՀՊԿ-ի հայտարարության մեջ։
«Գետնից ստացված հաղորդագրությունները, արբանյակային պատկերները և որսացված հետախուզական տվյալները հաստատում են տասնյակ բալիստիկ հրթիռների արդյունավետ ազդեցությունը ռազմավարական թիրախների վրա (օկուպացված Պաղեստինում)։ Չնայած թշնամու կողմից կասեցման մասին պնդումներին, նրանք չկարողացան հետ մղել Իրանի Իսլամական Հանրապետության կողմից իրականացված հրթիռային հարվածների ալիքը»։ ««Իրական խոստում III» գործողությունն իրականացվել է Իսլամական հեղափոխության առաջնորդի և Իրանի զինված ուժերի գերագույն հրամանատարի հրահանգին համապատասխան և ի պատասխան Իրանի ազնիվ ազգի պահանջի», - ասվում է հայտարարության մեջ։
