Պորտուգալիայի նախագահ Անտոնիու Ժոզե Սեգուրուն ստորագրել է օրենք, որն արգելում է հանրային վայրերում դեմքը փակելը, հաղորդում է Euroactiv-ը։
Փաստաթուղթը, որը տեղական լրատվամիջոցները անվանում են «նիքաբի մասին օրենք», լայնորեն դիտարկվում է որպես միջոց, որն առաջին հերթին ուղղված է այն մահմեդական կանանց դեմ, որոնք կրում են դեմքն ամբողջությամբ փակող հագուստ։
«Դեմքը պետք է դիտարկվի որպես մարդկային ինքնության և հաղորդակցության կենտրոնական տարր», — հայտարարել է Սեգուրուն։
Օրենքը հուլիսին ընդունվել է խորհրդարանի կողմից՝ իշխող աջակենտրոն կոալիցիայի և ծայրահեղ աջ կուսակցությունների աջակցությամբ։ Ձախ քաղաքական ուժերը հանդես են եկել դրա դեմ։
Փաստաթուղթն արգելում է հանրային վայրերում կրել հագուստ և այլ պարագաներ, որոնք նախատեսված են դեմքը թաքցնելու կամ անձի նույնականացումը խոչընդոտելու համար։ Արգելվում է նաև մեկ այլ անձի հարկադրել փակել դեմքը սեռի, կրոնի, տարիքի կամ ծագման հետ կապված պատճառներով։
Մարդու իրավունքների պաշտպանները նշում են, որ նման արգելքները կարող են սահմանափակել կանանց իրավունքները՝ փաստացի թելադրելով նրանց, թե ինչ հագուստ կրել։
Սեգուրուն ընդունել է, որ հարցն ունի «մեծ սոցիալական և մշակութային զգայունություն»։
Օրենքը խախտելու համար նախատեսված են 150-ից մինչև 3 հազար եվրո տուգանքներ։ Բացառություններ են նախատեսված, մասնավորապես, բժշկական ցուցումների, մասնագիտական կամ գեղարվեստական գործունեության, եղանակային պայմանների, ինչպես նաև պաշտամունքի վայրերում, դիվանագիտական ներկայացուցչություններում և ինքնաթիռների բորտում գտնվելու դեպքերի համար։
