Մասիսի Սուրբ Գևորգ եկեղեցու հոգևոր հովիվ Տեր Թաթուլ քահանայի հրավերով՝ Մասյացոտնի թեմի առաջնորդ Գերաշնորհ Տեր Ռուբեն եպիսկոպոս Զարգարյանն այսօր այցելեց Սիս բնակավայրում կազմակերպված ճամբարի սաներին։
Սրբազան Հայրը ուրախությամբ ողջունեց բոլորին և իր օրհնության խոսքում մասնավորապես նշեց.
Այս շնորհները նման են բնության մեջ թաքնված հարստություններին։ Ոսկին կամ թանկարժեք քարը գետնի վրա պատրաստի չեն գտնվում։ Դրանք պետք է հայտնաբերել, մշակել և արժեք դարձնել։ Այդպես է նաև ձեր կյանքում։ Դուք եկել եք այս ճամբար, որպեսզի մի փոքր ավելի ճանաչեք ինքներդ ձեզ, ավելի լավ հասկանաք, թե Աստված ինչ գեղեցիկ ադամանդներ է դրել ձեր սրտի մեջ, և սովորեք դրանք օգտագործել ոչ միայն ձեզ համար, այլև ուրիշների բարիքի համար։
Մենք բոլորս ապրում ենք որպես մեկ մեծ ընտանիք՝ մեր հայրենի երկրում։ Ընտանիքում բոլորը տարբեր են, բայց բոլորն իրար պետք են։ Այդպես էլ մեր ժողովուրդն է։ Մեզանից յուրաքանչյուրը մի փոքրիկ լույս է, և երբ այդ լույսերը միանում են, ամբողջ տունն է լուսավորվում։ Ուստի սովորե՛ք միասին ապրել, հարգել միմյանց, ներել, օգնել, ուրախանալ ընկերոջ հաջողությամբ և երբեք միայնակ չթողնել նրան, ով տխուր է կամ դժվարության մեջ է։
Սիրելի՛ երեխաներ, իմ աղոթքն ու մաղթանքն այն է, որ այս բակային հոգևոր ճամբարը ձեր սրտերում թողնի լույս և ջերմություն։ Թող այստեղ գտնեք նոր ընկերներ, սովորեք սիրել միմյանց, բացահայտեք ձեր ներքին գեղեցիկ շնորհները և տուն վերադառնաք ավելի ուրախ, ավելի բարի և ավելի մոտ Աստծուն։
Թող Տերը օրհնի ձեզանից յուրաքանչյուրին, պահպանի ձեր ծնողներին, ուսուցիչներին և ձեզ դարձնի լույս ու հույս մեր սիրելի հայրենիքի համար։ Հզորացրե’ք ձեր Սիս համայնքը՝ հանուն մեր մեծ համայնքի, որ Հայաստան աշխարհն է եւ հայ ազգը: Ամեն»։
Սրբազան Հայրը օրհնության և երախտագիտության ջերմ խոսքերով իր գնահատանքն ու քաջալերանքն ուղղեց հոգևոր հովվին, վարչական ղեկավարին, ծնողներին ու մանկավարժներին, կամավորներին և հոգևոր ճամբարի բոլոր կազմակերպիչներին՝ ընդգծելով, որ նրանց սիրով, նվիրումով և համատեղ ծառայությամբ է հնարավոր երեխաների սրտերում սերմանել հավատքի, բարության և հայրենասիրության սերմերը։
