Կառավարության մայիսի 27-ի նիստում Հայաստանի ՆԳ նախարար Արփինե Սարգսյանը ներկայացրել է վարորդական իրավունքից զրկված անձանց վարորդական իրավունքի վերականգնման մոդելի փոփոխության մասին որոշման նախագիծը:
«Արմենպրես»-ի փոխանցմամբ՝ ՆԳ նախարարության տարածած հաղորդագրության մեջ շեշտվում է, որ օրենսդրական նախաձեռնությամբ՝ առաջարկվում է ՀՀ-ում կիրառել զրկման ժամկետի ավարտից հետո խիստ սահմանափակման հնարավորությամբ 6 տուգանային միավորի տրամադրման պայմաններում 1 տարի ժամկետով փորձաշրջանի ընթացակարգ սահմանելու մոդելը:
Անդրադառնալով երթևեկության կանոնների խախտումների մասով զսպման մեխանիզմներին՝ ՆԳ նախարար Արփինե Սարգսյանը նշել է․
«Փորձում ենք հասկանալ, թե բալային սխեման ինչպես պետք է փոփոխենք, և հատկապես օրինապահ և ոչ օրինապահ վարորդների դեպքում ինչպիսի ռեակցիաներ պետք է տանք, որովհետև դրանք պետք է լինեն տարբեր»։
ՆԳ նախարարի խոսքով՝ ոչ օրինապահ վարորդների դեպքում թե՛ տեխնիկական զննությունը, թե՛ ապահովագրության վճարները կամ մնացյալ հարցերը պետք է լինեն շատ ավելի խիստ կանոնակարգումների տիրույթում։
Արփինե Սարգսյանը նշել է՝ այս պահի դրությամբ մշակվում են նաև օրինապահ վարորդների խրախուսման ծրագրեր, որպեսզի այս տեսանկյունից պետության վերաբերմունքը բալանսավորված լինի, և ընկալելի լինի, որ խրախուսելի են բոլոր օրինապահ վարորդները։
Նախարարը որպես խրախուսման օրինակ նշել է ապահովագրական վճարի հետ կապված տարբեր բոնուսային մեխանիզմների ներդրումը, ավելին քան գործում է այս պահի դրությամբ։
«Կարծում եմ առաջիկա ամիսներին Կենտրոնական բանկի հետ արդեն կամփոփենք մեր քննարկումները և վերջնական մոդելը կներկայացնենք նաև Կառավարության քննարկմանը»,-հավելել է Արփինե Սարգսյանը։
