Ամերիկա-քուվեյթյան լրագրողն ազատ է արձակվել այն բանից հետո, երբ նրան մի քանի շաբաթ պահում էին Քուվեյթում՝ ամերիկա-իրանական պատերազմի տեսագրությունները տարածելու համար։ Այս մասին AFP գործակալությանը հայտնել է ԱՄՆ Պետդեպարտամենտի ներկայացուցիչը։
Լրագրող Ահմեդ Շիհաբ Էլդինը, որը համագործակցել է New York Times-ի, PBS-ի և Al Jazeera English-ի հետ, ձերբակալվել էր մարտի 3-ին՝ կեղծ տեղեկություններ տարածելու, ազգային անվտանգությանը վնաս հասցնելու և բջջային հեռախոսը ոչ պատշաճ օգտագործելու մեղադրանքով։
ԱՄՆ Պետդեպարտամենտի ներկայացուցիչը հայտնել է, որ Շիհաբ Էլդինն ապահով լքել է Քուվեյթը։
«Կալանքի տակ գտնվելու ընթացքում Պետական դեպարտամենտը կապ է պահպանել պարոն Շիհաբ Էլդինի հետ և ցուցաբերել հյուպատոսական օգնություն»,- հավելել է պաշտոնյան։
Լրագրողների պաշտպանության կոմիտեն (ԼՊԿ) հինգշաբթի հայտարարել է, որ Շիհաբ Էլդինի վրայից հանվել են բոլոր մեղադրանքները՝ 52 օր անազատության մեջ մնալուց հետո։
Ըստ ԼՊԿ-ի տվյալների, մինչև ձերբակալությունը Շիհաբ Էլդինի վերջին գրառումներից մեկը պարունակում էր CNN-ի կողմից հաստատված տեղորոշմամբ մի տեսանյութ, որտեղ պատկերված էր Քուվեյթում ամերիկյան ավիաբազայի մոտակայքում ամերիկյան կործանիչի կործանումը։
Պարսից ծոցի ողջ տարածքում հարյուրավոր մարդիկ են ձերբակալվել հարձակումների և դրանց հետևանքով պատճառված վնասների լուսանկարները տարածելու համար։ Հարվածները հասցվում էին գրեթե ամեն օր՝ փետրվարի 28-ին մերձավորարևելյան հակամարտության սկզբից մինչև ապրիլի 8-ին հրադադարի համաձայնագրի ուժի մեջ մտնելը։
