Վրաստանը նվաճեց իր առաջին մեդալը Ձմեռային օլիմպիական խաղերի ողջ պատմության ընթացքում։ Այս մասին գրում է aliq.ge-ն։
Իտալիայում կայացած XXV Ձմեռային օլիմպիական խաղերում Լուկա Բերուլավան և Անաստասիա Մետելկինան հաջողությամբ հանդես եկան գեղասահքի զույգերի մրցույթում և նվաճեցին արծաթե մեդալ։
Սպորտի նախարարության հաղորդմամբ՝ զույգն ազատ ծրագրում մրցավարներից ստացել է 146.29 միավոր։ Ընդհանուր առմամբ, երկու ծրագրում նրանք հավաքել են 221.75 միավոր։
Օլիմպիական խաղերը շարունակվում են գեղասահքի մյուս վրացի մարզիկների ելույթներով։ Անաստասիա Գուբանովան սառույցի վրա հանդես կգա փետրվարի 17-ին կարճ ծրագրով։
XXV Ձմեռային օլիմպիական խաղերն ընթանում են Միլանում և Կորտինա դ’Ամպեցոյում և կավարտվեն փետրվարի 22-ին։ Այս տարի Վրաստանն Օլիմպիական խաղերում ներկայացված է ընդհանուր առմամբ ութ մարզիկով՝ երկու մարզաձևերում (գեղասահք և լեռնադահուկային սպորտ)։
