Իրանը չի փորձում ազդել Գազայի հատվածում հրադադարի ռեժիմի հաստատման շուրջ բանակցային գործընթացի վրա և ԱՄՆ նախագահ Դոնալդ Թրամփի հակառակ հայտարարությունները պայմանավորված են իսրայելական գործողություններին աջակցելու համար պատասխանատվությունից խուսափելու ցանկությամբ։ Այս մասին հայտարարել է Իսլամական Հանրապետության արտաքին գործերի նախարարության պաշտոնական ներկայացուցիչ Իսմայիլ Բաղային։
«Բանակցային գործընթացին Իսլամական Հանրապետության միջամտության վերաբերյալ ցանկացած պնդում բացարձակապես անհիմն է և ներկայացնում է ԱՄՆ-ի կողմից Պաղեստինի ժողովրդի դեմ Սիոնիստական ռեժիմի (նկատի ունի Իսրայելի) հանցագործություններին մեղսակից լինելու պատասխանատվությունից խուսափելու փորձ՝ 60,000 անմեղ մարդկանց, այդ թվում՝ կանանց և երեխաների սպանությունը, վերջին ամիսներին Գազայի հատվածի շրջափակման խստացումը, անկլավի բնակիչներին մարդասիրական օգնության մատակարարման դադարեցումը, ամերիկյան ընկերության կողմից տեղադրված այսպես կոչված օգնության բաշխման կետերի մահվան թակարդներում քաղցած և ծարավ մարդկանց սպանությունը», - նրա խոսքերը մեջբերում է IRNA-ն։
Իրանցի դիվանագետը նշել է, որ Իսլամական Հանրապետությունը, ինչպես աշխարհի մեծ մասը, խստորեն դատապարտում է Գազայի հատվածում տեղի ունեցած ցեղասպանությունը և աջակցում է ցանկացած նախաձեռնության, որը կհանգեցնի ռազմական գործողությունների դադարեցմանը և անկլավում պաղեստինցիների իրավիճակի բարելավմանը։
Հուլիսի 28-ին ԱՄՆ նախագահ Դոնալդ Թրամփը հայտարարել է, որ Միացյալ Նահանգները պատրաստ է կրկին հարված հասցնել Իրանի միջուկային օբյեկտներին, եթե նա կասկածի, որ Իրանը ձգտում է վերականգնել իր ներուժը։ Ավելի վաղ Սպիտակ տան ղեկավարը նաև մեղադրել է Թեհրանին՝ արմատական պաղեստինյան ՀԱՄԱՍ շարժման և Իսրայելի միջև Գազայի հատվածում հրադադարի ռեժիմի հաստատման շուրջ բանակցություններին միջամտելու փորձերի մեջ։
