«Մանչեսթեր Յունայթեդի» ղեկավարությունը մտադիր է պահպանել թիմի ներկայիս գլխավոր մարզիչ Մայքլ Կարիկին իր պաշտոնում։ Անգլիական գրանդն առաջիկայում պաշտոնական բանակցություններ կսկսի 44-ամյա մասնագետի հետ՝ ակումբում նրա աշխատանքը շարունակելու նպատակով։

Սպասվում է, որ կողմերի հանդիպումը կկայանա մինչև Անգլիայի Պրեմիեր լիգայի եզրափակիչ՝ 38-րդ տուրի շրջանակում մայիսի 24-ին նախատեսված «Բրայթոնի» դեմ արտագնա խաղը։

Հիշեցնենք, որ Կարիկը գլխավորում է «կարմիր սատանաներին» ընթացիկ տարվա հունվարի 13-ից՝ այդ պաշտոնում փոխարինելով Ռուբեն Ամորիմին։ Անգլիացի մասնագետի ղեկավարությամբ անցկացրած 15 հանդիպումներում մանկունիացիները տոնել են 10 հաղթանակ, 3 անգամ գրանցել ոչ-ոքի և կրել ընդամենը 2 պարտություն։

Անգլիայի առաջնության 36 տուրից հետո «Մանչեսթեր Յունայթեդը» վաստակել է 65 միավոր և զբաղեցնում է մրցաշարային աղյուսակի 3-րդ հորիզոնականը։ Այս ցուցանիշով թիմն արդեն իսկ ապահովել է իր մասնակցությունը Չեմպիոնների լիգայի հաջորդ խաղարկության լիգայի փուլին։