Մերձավոր Արևելքում հակամարտությունը շարունակվում է արդեն 21 օր։ Պարսից ծոցի մի քանի երկիր հայտնել է անօդաչու թռչող սարքեր որսալու մասին։
Քուվեյթի նավթային կորպորացիայի Մինա ալ-Ահմադիի նավթավերամշակման գործարանը մարտի 20-ի առավոտյան մի քանի անգամ ենթարկվել է անօդաչու թռչող սարքերի հարձակումների։ «Արմենպրես»-ի փոխանցմամբ՝ այս մասին հաղորդում է Al Jazeera-ն։
Որոշ ստորաբաժանումներում հրդեհներ են բռնկվել, մի քանիսը փակվել են, սակայն զոհերի մասին տեղեկություններ չեն հաղորդվել։
Հրշեջ և արտակարգ ծառայություններն անմիջապես ժամանել են դեպքի վայր։
Սաուդյան Արաբիայի պաշտպանության նախարարությունն էլ հայտարարել է, որ երկրի Արևելյան նահանգում 13 անօդաչու թռչող սարք են որսացել և ոչնչացրել։ Ըստ գերատեսչության՝ երկիրը շարունակում է պաշտպանվել անօդաչու թռչող սարքերի հոսքից վերջին մի քանի ժամվա ընթացքում։ Նախարարությունը նաև հայտարարել է գիշերվա ընթացքում երկու տասնյակից ավելի ԱԹՍ որսալու մասին։
Դուբայի լրատվական գրասենյակն իր հերթին հայտարարել է քաղաքում ԱԹՍ-ներ որսալու հաջող գործողությունների մասին։ Տուժածներ չկան։
Բահրեյնի ներքին գործերի նախարարությունն էլ հայտարարել է, որ քաղաքացիական պաշտպանության խմբերը մարել են երկրի ընկերություններից մեկի պահեստում բռնկված հրդեհը, որն առաջացել էր Իրանի կողմից արձակված ԱԹՍ-ի բեկորներից։ Նախարարությունը հայտնել է, որ քաղաքացիական պաշտպանության աշխատակիցները հրդեհը վերահսկողության տակ են վերցրել, և որ տուժածներ չեն գրանցվել։
ԱՄՆ-ն և Իսրայելն Իրանի դեմ համատեղ ռազմական գործողություն են սկսել փետրվարի 28-ից՝ մեղադրելով Թեհրանին հրթիռային և միջուկային ծրագիրը զարգացնելու համար։ Իրանը, հերքելով մեղադրանքները, սկսել է պատասխան հարվածներ հասցնել Իսրայելին, ինչպես նաև տարածաշրջանի երկրներում ամերիկյան ռազմաբազաներին։ Հարվածներից տուժել են Քուվեյթը, Կատարը, ԱՄԷ-ն, Սաուդյան Արաբիան, Օմանը, Բահրեյնը, Իրաքը։
