ՀՀ սննդամթերքի անվտանգության տեսչական մարմնի Սյունիքի մարզային կենտրոնի տեսուչները վերահսկողություն են իրականացրել «Աննա-Դիանա» ՍՊԸ-ին պատկանող (Սյունիքի մարզ, ք․ Սիսիան) հացի արտադրամասում։ Ստուգման ընթացքում պարզվել է, որ արտադրական գործընթացներն այստեղ իրականացվում են սննդամթերքի հիգիենային ներկայացվող սահմանված պահանջների խախտմամբ։
Մասնավորապես՝
արտադրական շինությունների նախագծումը, դրանց կառուցվածքը, դասավորվածությունը և չափսը չեն ապահովել՝
տեխնիկական սարքավորումների սպասարկման և արտադրական տարածքների մաքրման հնարավորությունը,
սննդամթերքի պաշտպանությունը աղտոտումից, կեղտից, կոնդենսատից ու բորբոսից,
հումքի, փաթեթավորման նյութերի և սննդամթերքի ճիշտ պահպանման պայմանները,
արտադրական տարածքը ապահովված չի եղել բնական և արհեստական լուսավորվածությամբ,
լվացարանները ապահովված չեն եղել ձեռքերը սրբելու, չորացնելու համար նախատեսված սարքերով,
արտադրական տարածքի հատակների և պատերի մակերևույթները պատրաստված չեն եղել անջրանցիկ, լվացվող և ախտահանվող նյութերից,
առաստաղները ապահով չեն եղել և չեն կանխել կեղտի, բորբոսի, մասնիկների թափվելու և խոնավության կուտակման ռիսկը,
սննդամթերքի հետ շփվող սարքավորումները, մակերևույթները, դարակաշարերը, սեղանները չեն համապատասխանել հիգիենայի պահանջներին:
Տեսչական մարմնի ղեկավարի որոշմամբ՝ հացի արտադրամասի արտադրական գործունեությունը կասեցվել է, սահմանվել է ժամկետ հայտնաբերված խախտումները վերացնելու համար:
