Սյունիքի ճանապարհը չի՛ կարող Հայաստանին տնտեսական օգուտներ բերել․ Սյունիքի ճանապարհն օգուտներ է բերելու թուրքական աշխարհին, Թուրքիային, Ադրբեջանին, այլ պետություններին, այդ թվում՝ արևմտյան պետություններին, բայց ոչ Հայաստանին։ Ընդհակառակը, Հայաստանին տնտեսական հարձակում է սպառնում, այնուհետև տնտեսական կապիտուլյացիա և թուրքական ապրանքներով Հայաստանի շուկայի ողողում։ Թուրքիայի սահմանը կարելի է բացել միայն այն ժամանակ, երբ Հայաստանում տնտեսական ներուժը բերված կլինի պատշաճ վիճակի»,- նշեց տնտեսագետը։

Նաիրի Սարգսյանի համոզմամբ, մինչև սահմանի բացումը Հայաստանը «տնային աշխատանք» ունի կատարելու, օրինակ, գյուղատնտեսական, տեքստիլ, մշակող արդյունաբերությունը բերել այնպիսի անվտանգ վիճակի, որ թուրքական ապրանքները սպառնալիք չհանդիսանան հայկական արտադրանքի նկատմամբ, որ հայկական արտադրանքը շարունակի գոնե տեղական շուկայում լինել մրցունակ։

«Այսօր, երբ հայտարարում են ճանապարհների ապաշրջափակման մասին, պետք է չմոռանալ, որ Թուրքիան միամիտ չի խաղում, միամիտ չի համագործակցում պետությունների հետ․ Թուրքիան, այդ թվում, պայմաններ է առաջ քաշում, որ՝ դուք պետք է չարտադրեք, մենք պետք է արտադրենք և ձեզ վաճառենք, Թուրքիան արգելում է պատրաստի արտադրանքի մատակարարումն իր երկիր՝ բացառապես հումքն է ներկրում»,- հավելեց նա։

Նաիրի Սարգսյանը նկատեց՝ նույնիսկ թուրքական արտադրանքի դեմ մաքսատուրքերով պահպանման դեպքում Թուրքիան կրկին ճանապարհների փակում է իրականացնելու, այդ թվում՝ ռազմական լուծումներ են փնտրելու տնտեսական պատերազմն ավարտին հասցնելու համար։ Հետևաբար, ըստ նրա, Հայաստանի Հանրապետությունը պետք է իր արտադրանքի պաշտպանվածությունը ապահովի, նոր կարողանա խոսել ճանապարհների ապաշրջափակման մասին։

Հարցին, թե մինչև «տնային աշխատանքն» այսօր ՀՀ տնտեսությունում ինչպիսի՞ միտումներ են, տնտեսագետը պատասխանեց․ «Արդյունաբերությունը մոտ 16 տոկոս անկման մեջ է շարունակաբար՝ մի քանի ամիս արդեն, մշակող արդյունաբերությունը նույնիսկ 30 տոկոս անկում է ապրել վերջին 6 ամիսներին։

Ու միայն այս թվերը հայտարարելով, արդեն ակնհայտ է, որ տնտեսությունը շարունակում է մնալ «ծանր անկայուն» վիճակում, այսինքն՝ անընդհատ բացասական միտումով»։