Իրանի արտաքին գործերի նախարար Աբբաս Արաղչին հեռախոսազրույց է ունեցել Արաբական Միացյալ Էմիրությունների ԱԳ նախարար շեյխ Աբդուլլահ բեն Զայեդ Ալ Նահայանի հետ։ Նա ընդգծել է Իսրայելի դավադրությունների նկատմամբ իսլամական պետությունների զգոնության անհրաժեշտությունը, հայտնում է Mehr-ը։
Հեռախոսազրույցի ընթացքում Արաղչին հայտարարել է, որ Իսրայելը ձգտում է խաթարել տարածաշրջանի անվտանգությունը և կոչ է արել տարածաշրջանի բոլոր երկրներին՝ զգոն մնալ նման դավադրությունների նկատմամբ։
Արաղչին նաև հայտարարել է, որ Իսրայելը «հակված է պատերազմ հրահրելուն և անօրինականություն գործադրելուն»։
Իրանի և ԱՄԷ-ի բարձրաստիճան դիվանագետները քննարկել են տարածաշրջանում վերջին զարգացումները, մասնավորապես՝ Պաղեստինում տիրող իրավիճակը։
Արաղչին և Նահյանը նաև մտքեր են փոխանակել երկկողմ հարաբերությունների բարելավման ուղիների շուրջ՝ քաղաքական, տնտեսական և առևտրային ոլորտներում։
Նրանք ընդգծել են երկու երկրների ներուժն օգտագործելու անհրաժեշտությունը՝ փոխադարձ հետաքրքրություն ներկայացնող հարցերի շուրջ կապերը ընդլայնելու համար։
