Ֆրանսիական լրատվամիջոցները հոկտեմբերի 20-ին հաղորդել են, որ Ֆրանսիայում տեղի ունեցած զանգվածային անկարգություններից երեք օր անց ոստիկանությունը ձերբակալել է Լիմոժի (Հոտ-Վիեն) քաղաքապետարանի հրկիզման մեջ կասկածվող անձին։ Տղամարդը ոստիկանությանը հայտնի է որպես ձախ ծայրահեղական հայացքների կողմնակից։ Նա նախկինում խնդիրներ է ունեցել օրենքի հետ։

AFP-ն հղում անելով աղբյուրներին՝ հաղորդում է, որ հետաքննությունը ստանձնել է ոստիկանության հակաահաբեկչական ստորաբաժանումը։ Տղամարդը 40 տարեկան է։

Լիմոժի քաղաքապետ Գիյոմ Գերենը քննադատել է պետական մարմիններին՝ մեղադրելով ոստիկանությանը բավարար ռեսուրսներ չունենալու և վանդալիզմի գործողությունների ժամանակ նահանջելու մեջ։ Նա պահանջել է, որ պետությունը ֆինանսավորի քաղաքապետարանի վերականգնումը։

AFP-ի տվյալներով՝ Ֆրանսիայի մի շարք այլ քաղաքների, այդ թվում՝ Փարիզի, Մարսելի և Լիոնի քաղաքապետերը նույնպես քննադատել են իրավապահ մարմինների աշխատանքը՝ մատնանշելով ոստիկանների պակասն ու նրանց պատրաստվածության խնդիրները։

Հոկտեմբերի 17-ին Լիմոժի քաղաքապետարանի շենքում բռնկված հրդեհի հետևանքով 19-րդ դարում կառուցված պատմական կառույցը զգալի վնասներ է կրել։ Մասնավորապես՝ փլուզվել է շենքի 43 մետր բարձրությամբ զանգակատունը։

1883 թվականին ճարտարապետ Շառլ-Ալֆրեդ Լեկլերկի նախագծով կառուցված քաղաքապետարանը Ֆրանսիայի պահպանվող պատմական հուշարձաններից է։