Հայաստանը դե ֆակտո չի մասնակցում ՀԱՊԿ քննարկումներին, բայց դե յուրե մնում է անդամ, ՏԱՍՍ-ին տված հարցազրույցում հայտարարել է ՀԱՊԿ գլխավոր քարտուղար Թաալատբեկ Մասադիկովը։
«Գիտեք, մենք երկար ժամանակ քննարկում ենք այս հարցը։ Դե ֆակտո, Հայաստանը ներկայումս չի մասնակցում ՀԱՊԿ քննարկումներին։ Դե ֆակտո, Հայաստանը իր աշխատակիցներին, զինվորականներին կամ ՀԱՊԿ քարտուղարության աշխատակիցներին չի ուղարկում քվոտային պաշտոնների, և արդեն երրորդ տարին է, ինչ Հայաստանը չի վճարել անդամակցության վճարները։ Բայց դե յուրե նրանք մնում են Հավաքական անվտանգության պայմանագրի կազմակերպության անդամ», - նշել է նա։
Գլխավոր քարտուղարի խոսքով՝ Հայաստանը նշանակալի ներդրում է ունեցել ՀԱՊԿ-ի զարգացման գործում, և հայ ժողովուրդը տարբեր ժամանակներում աջակցել է երկրի ղեկավարության բոլոր նախաձեռնություններին։
