ՈւԵՖԱ-ի Չեմպիոնների լիգայի պաշտոնական մամուլի ծառայության էջը հրապարակել է մրցաշարի կիսաեզրափակիչ փուլի առաջին հանդիպումների արդյունքներով կազմված շաբաթվա խորհրդանշական հավաքականը, ինչպես նաև հայտնել շաբաթվա լավագույն ֆուտբոլիստի անունը:
Լավագույնի կոչմանն արժանացել է ֆրանսիական ՊՍԺ-ի եզրային հարձակվող Ուսման Դեմբելեն: Մյունխենի «Բավարիայի» դեմ խելահեղ հանդիպումում, որտեղ պարիզցիները հաղթեցին 5:4 հաշվով, ֆրանսիացին դարձել է դուբլի և գոլային փոխանցման հեղինակ: Քվեարկության արդյունքում Դեմբելեն առաջ է անցել Մադրիդի «Ատլետիկոյի» հարձակվող Անտուան Գրիզմանից, ում թիմը 1:1 հաշվով էր ավարտել լոնդոնի «Արսենալի» դեմ արտագնա խաղը:
Շաբաթվա խորհրդանշական հավաքականում ևս գերիշխում են Չեմպիոնների լիգայի գործող չեմպիոն ՊՍԺ-ի ֆուտբոլիստները՝ ընդհանուր առմամբ ունենալով չորս ներկայացուցիչ:
Չեմպիոնների լիգայի շաբաթվա խորհրդանշական հավաքականն ունի հետևյալ տեսքը.
Դարպասապահ՝ Դավիդ Ռայա («Արսենալ»)
Պաշտպաններ՝ Գաբրիել Մագալյանս («Արսենալ»), Դայո Ուպամեկանո («Բավարիա»), Մարկ Պուբիլ («Ատլետիկո»)
Կիսապաշտպաններ՝ Վիտինյա (ՊՍԺ), Ժոաու Նևեշ (ՊՍԺ), Խվիչա Կվարացխելիա (ՊՍԺ), Մայքլ Օլիսե («Բավարիա»)
Հարձակվողներ՝ Լուիս Դիաս («Բավարիա»), Ուսման Դեմբելե (ՊՍԺ), Անտուան Գրիզման («Ատլետիկո»):
Հիշեցնենք, որ «Բավարիա»-ՊՍԺ պատասխան հանդիպումը կկայանա մայիսի 6-ին Մյունխենի «Ալյանց Արենա» մարզադաշտում: Չեմպիոնների լիգայի ընթացիկ խաղարկության եզրափակիչը տեղի կունենա 2026 թվականի մայիսի 30-ին՝ Բուդապեշտի «Պուշկաշ Արենա» մարզադաշտում:
