Առողջապահության նախարար Անահիտ Ավանեսյանը քննադատել է Հայաստանի ազգային ժողովի պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի՝ բանակից ազատվելու մասին հայտարարությունը։
Հիշեցնենք՝ Քոչարյանը լրագրողի հետ զրույցում, մասնավորապես, հարցին, թե ինչու իր որդին չի ծառայել ՀՀ Զինված ուժերում, պատասխանել էր․
«Իմ տղան իր գիտելիքների շնորհիվ ա ազատվել բանակից, նա բարձրակարգ մարդ է, դու նրա գիտելիքների չափ ունենաս՝ դու էլ չես ծառայի»։
Ավանեսյանը գրել է․
«Մեծ ցավ ապրեցի պարոն Անդրանիկ Քոչարյանի կողմից այսօր թույլ տված անզգույշ արտահայտության համար, և նորից պետք է ընդգծեմ ` Հայոց բանակում ծառայում են մեր արժանավոր ու լուսավոր տղաները, ովքեր նախընտրում են իրենց պարտքը հայրենիքի առաջ տալ նաև մինչ իրենց ուսումնառությունը:
Բանակում ծառայելը պատիվ է և կյանքի մեծ դպրոց, որը այլ բանով չի փոխարինվի:
Բարի ծառայություն մեր բոլոր զինվորներին և հաջող ուսումնառություն մեր տղաներին. նրանք բոլորը մեր երկրի հպարտությունն են»:
