Ռուսաստանը և Ուկրաինան շարունակում են փոխադարձ հարվածները՝ չնայած Աբու Դաբիում ընթացող ԱՄՆ-ՌԴ-Ուկրաինա եռակողմ բանակցություններին։ Ռուսական ուժերի հարվածների հետևանքով Դոնեցկի մարզում 7 մարդ է զոհվել։ «Արմենպրես»-ի փոխանցմամբ՝ այս մասին հաղորդում է BBC-ի ռուսական ծառայությունը՝ վկայակոչելով տեղական իշխանություններին։
Նշվում է, որ ռուսական ուժերը կասետային զինամթերքով գնդակոծել են Դրուժովկա քաղաքը։ Հարվածի տակ է հայտնվել շուկան, որտեղ առավոտյան այդ ժամին եղել են մեծ թվով մարդիկ, որոնցից 7-ը զոհվել են, 8-ը՝ վիրավորվել։ Բացի այդ, Դրուժովկայի վրա ռուսական ուժերը երկու ավիառումբ են նետել։ Վնասվել են արդյունաբերական գոտի, 3 բազմահարկ շենք և 3 մասնավոր տուն։
Իր հերթին, Ուկրաինայի նախագահ Վոլոդիմիր Զելենսկին հայտարարել է, որ Կիևում 1100 բազմաբնակարան շենք մնացել է առանց ջեռուցման։
Ռուսական ուժերը հարվածել են նաև Օդեսային, որտեղ հինգ մարդ է վիրավորվել։
Ռուսական կողմն էլ հայտնել է, որ Խերսոնի մարզի՝ ՌԴ վերահսկողության տակ անցած հատվածում ուկրաինական հարվածներից 4 մարդ է զոհվել, 12-ը՝ վիրավորվել։ Իսկ Գոլայա Պրիստան քաղաքում հրետանային հարվածներից 88-ամյա կին է զոհվել։
ՌԴ Բրյանսկի մարզը ևս ենթարկվել է զանգվածային հարվածների HIMARS համակարգերով, ռեակտիվ ԱԹՍ-ներով և «Նեպտուն» հեռահար կառավարվող ռումբերով։ Ըստ նահանգապետի՝ վնասվել են 20 մասնավոր տուն, բազմաբնակարան շենքում՝ 27 բնակարան, փլուզվել է մեկ տուն։
Բելգորոդի նահանգապետն իր հերթին հայտնել է, որ ուկրաինական ուժերը հրթիռակոծել են էներգետիկայի օբյեկտները, ինչի պատճառով մի քանի դպրոց անցել է հեռավար ուսուցման։
