Եվրամիությունը մտադիր է ակտիվորեն ներդրումներ կատարել Ուկրաինայի ռազմական արդյունաբերության մեջ և «տեղափոխել այն Եվրոպա», ինչը նոր աշխատատեղեր կստեղծի։ Ըստ ТАСС-ի՝ մտադրության մասին Կոպենհագենում ԵՄ արտաքին գործերի և պաշտպանության նախարարների ոչ պաշտոնական հանդիպման առաջին օրվանից հետո անցկացված մամուլի ասուլիսում հայտարարել է ԵՄ դիվանագիտական ​​ծառայության ղեկավար Կայա Կալլասը։

Նա հավելել է, որ նախարարներն առաջարկել են « Ուկրաինայի ռազմական արդյունաբերությունը Եվրոպա հրավիրել»։ «Դա մեզ համար լավ է, քանի որ մեզ նոր աշխատատեղեր կտրամդրի»,- ընդգծել է նա՝ առանց ճշգրտելու նախաձեռնության մանրամասները։

Դանիայի պաշտպանության նախարար Տրոելս Լունդ Պոուլսենը հայտարարել է, որ առաջիկա շաբաթներին նախատեսվում է հրավիրել առաջին ուկրաինական պաշտպանական ընկերություններին՝ Դանիայի տարածքում անվտանգ միջավայրում արտադրություն սկսելու համար։

«Հույս ունեմ նաև, որ ավելի շատ ուկրաինական ընկերություններ կհետևեն այդ օրինակին»,- հավելել է նա։ Ավելի վաղ հայտարարվել էր Ֆյունեն կղզու Օդենսեում երեքից հինգ ուկրաինական պաշտպանական արդյունաբերության ձեռնարկություններ տեղակայելու ծրագրերի մասին, որտեղ մարտ ամսին անօդաչու թռչող սարքերի արտադրության կենտրոն է հիմնվել։

Լունդ Պոուլսենը պարզաբանել է, որ ուկրաինական գործարանների առկայությունը Դանիայում օգտակար կլինի նաև երկրի համար, քանի որ արտադրված անօդաչու թռչող սարքերը կմատակարարվեն դանիական բանակին։

Ուկրաինական ձեռնարկությունները Եվրոպա տեղափոխելու գաղափարը ժողովրդականություն է ձեռք բերել Ուկրաինայում եվրոպական միջոցներով կառուցված պաշտպանական օբյեկտների ոչնչացման դեպքերի աճի ֆոնին։