Ռուսաստանն աջակցում է Ադրբեջանի և Հայաստանի համատեղ որոշմանը՝ լուծարելու Եվրոպայի անվտանգության և համագործակցության կազմակերպության (ԵԱՀԿ) Մինսկի խումբը, որը զբաղվում էր Ղարաբաղյան հակամարտության կարգավորմամբ։ Այս մասին ՌԲԿ-ին հայտնել է ԵԱՀԿ-ում ՌԴ մշտական ներկայացուցիչ Ալեքսանդր Լուկաշևիչը՝ պարզաբանելով, որ խումբը վերջնականապես լուծարել նախատեսում են մինչև 2025 թվականի դեկտեմբերը։
Նա նշել է, որ խոսքը երեք կառույցների՝ Մինսկի խմբի, ԵԱՀԿ գործող նախագահի անձնական ներկայացուցչի պաշտոնի և բարձր մակարդակի պլանավորման խմբի աշխատանքի դադարեցման մասին է։ «Հաշվի առնելով կողմերի դիրքորոշումը՝ դրանց պահպանման աննպատակահարմարության մասին, մենք չենք տեսնում դրանց լուծարմանը խոչընդոտելու հիմքեր»,- հայտարարել է դիվանագետը։
Լուկաշևիչի խոսքով՝ Մինսկի խմբի լուծարման կարգը հետևյալն է. ԵԱՀԿ Մշտական խորհուրդը (քաղաքական խորհրդատվությունների գլխավոր մարմին) կազմակերպության անդամներին առաջարկել է «լուռ համաձայնությամբ» հաստատել այս հարցի վերաբերյալ նախարարական որոշումը։ Եթե մինչև սեպտեմբերի 1-ը ոչ ոք չառարկի խմբի լուծարմանը, ապա որոշումը կհամարվի ընդունված։
«Միաժամանակ անհրաժեշտ է հաշվի առնել, որ տվյալ որոշման կատարման հետ կապված վարչական և ֆինանսական միջոցառումները կտևեն մի քանի ամիս։ ԵԱՀԿ-ում ակնկալում են դրանք ավարտել ոչ ուշ, քան այս տարվա դեկտեմբերին։ Դրանից հետո բոլոր երեք կառույցները, որոնք պատասխանատու էին Լեռնային Ղարաբաղի կարգավորմանը աջակցելու համար, պետք է դադարեցնեն իրենց գոյությունը»,- հայտնել է Ռուսաստանի մշտական ներկայացուցիչը։
