Երբ մենք 2022–ին խոսում էինք սահմանային եւ մաքսային վերահսկողությունների մասին, կար այդպիսի ընկալում, որ Ադրբեջանի քաղաքացիները նման դեպքում կխուսափեն այդ ճանապարհներից օգտվելուց, որովհետեւ հայ մաքսավորների եւ այլ պաշտոնյաների հետ շփումները կարող են խնդիրներ առաջացնել։ Այս մասին այսօր՝ հուլիսի 16–ին, մամուլի ասուլիսի ժամանակ նշեց ՀՀ վարչապետ Նիկոլ Փաշինյանը՝ անդրադառնալով նրան, որ դեռեւս 2022–ին Հայաստանն առաջարկել էր ճանապարհների կառավարումն արտապատվիրակել որեւէ այլ կազմակերպության, սակայն Բաքուն մերժել էր։
«Այն ժամանակ մենք հրապարակային այդ առաջարկն արել ենք, որ պատրաստ ենք այդտեղ կիրառել ֆրոնտ–օֆիս և բեք–օֆիս տարբերակը, որը աշխարհում կիրառվող տարբերակ է։ Կան երկրներ, որոնք իրենց սահմանային եւ մաքսային ծառայությունները արտապատվիրակում են այդ ոլորտում գործունեություն ծավալող պրոֆեսիոնալ կամ միջազգային պրոֆեսիոնալ կազմակերպությունների։ Այն ժամանակ մենք այդ առաջարկներն արել ենք, որը չի ընդունվել։ Իսկ վերջին շրջանում նման առաջարկ ընդհանրապես չի քննարկվել։ Քանի որ դա մեր առաջարկն է, մենք հիմա էլ ենք պատրաստ դա քննարկել։
Բայց հիմա տեխնոլոգիաները շատ զարգացել են, օրինակ կենսաչափական անձնագրերի զարգացման հետ փորձագետների կանխատեսումն այն է, որ 5-10 տարի հետո սահմանային և օդանավակայանների անցակետերում այդ համակարգն է գործելու. մարդը անձնագիրը մոտեցնելու է և անցնի։ Դա չի նշանակում, որ այդտեղ մարդ չի լինելու, բայց գործնականում, այն, որ վերցնում են, թերթում են նայում, այդ ամենն արվելու է տեխնոլոգիաներով, որը շատ ավելի արդյունավետ է։ Եթե մարդուն կարելի է ինչ–որ ձեւով համոզել շրջանցել, ապա տեխնոլոգիաները բացառում են կոռուպցիոն ու անվտանգային բազմաթիվ ռիսկեր»,–ասաց նա։
Փաշինյանի խոսքով, եթե կենտրոնացած լինեին, թե որ տարբերակն է ընդունելի, հիմա այդ մասին կասեր. «Հիմա ես ներկայացնում եմ քննարկումների մեծ բովանդակությունը, կամ մենյուն, ինչից բաղկացած են մեր քննարկումները։ Մենք հնարավոր է գանք այս լուծումներից որեւէ մեկին, հնարավոր է այլ լուծման առաջարկ լինի։ Բայց այս պահին նոր լուծման առաջարկ չկա։
Ինչ էլ լսեք, միշտ իմացեք, որ դրանք քննարկվում են ՀՀ տարածքային ամբողջականության, ինքնիշխանության ու իրավազորության համատեքստում։
