Գիտեմ, որ Տարոն Մարգարյանը ներսում է, բայց դե ողջամիտ չի, որ փաստաբաններին ներս չեն թողնում, գոնե թող բացեն, պատճառաբանություն տան։ Այս մասին այսօր՝ հուլիսի 10–ին, Երեւան քաղաքի քննչական վարչության շենքի մոտ լրագրողների հետ զրույցում նշեց փաստաբան Սերգեյ Հարությունյանը։
«Իրավունք կա անմիջապես տեսակցելու պաշտպանյալիս, և պարտականություն կա իրենց կողմից անմիջապես ապահովելու այդ ամենը։ Ցավոք սրտի՝ տեսնում ենք ինչ է կատարվում։ Ու արդեն սա առաջին դեպքը չի, երեկ էլ ենք տեսել նմանատիպ վիճակ ու գնալով արդեն այդ ժամերը երկարացնում են, եթե առաջ 5-10 րոպե կարող է խոչընդոտեին, հիմա տեսնում ենք, որ շատ ավելի երկար է տևում։ Ի՞նչ ասեմ։
Այնքան գործուն քայլերի անհրաժեշտություն կա մեր երկրում, այն աստիճանի ամեն ինչը գնում է դեպի իրավունքից դուրս։ Խոչընդոտելով խախտում են մեր բոլոր պաշտպանյալների իրավունքները, բայց ցավոք սրտի օր-օրի մենք տեսնում ենք և բախվում ենք այն իրականության հետ, որ այլևս իրավունքի հետ, իրավաբանության հետ մենք գործ չունենք։ Մենք չգիտենք վաղը ինչ ապօրինություններ կլինեն, ինչի ականատես կլինենք ներկայիս վարչախմբի կողմից և ցավոք սրտի, իրավապահ համակարգն էլ դարձել է գործիք այս ամենը իրականացնելու»,–ասաց նա։
Հարցին՝ ի՞նչ հիմքով են ձերբակալել ՀՅԴ–ականներին, փաստաբանը պատասխանեց. «Տեղյակ եմ, հաջորդիվ մանրամասներին կանդրադառնանք։ Մի զավեշտալի դեպքը վերցրել են որպես հիմք, և դա օգտագործելով, այժմ փորձելու են մի շարք դաշնակցականների մեկուսացնել, հերթական շոուն անել, հերթական ինչ-որ կապը ստեղծել տարբեր ուժերի կամ տարբեր գործողությունների հետ։ Սա այն է, ինչ որ կատարվում է վերջին շաբաթներում»։
