Երեկ ուշ երեկոյան սյունեցի դեռահասները տուն են վերադարձել իրենց ձիերի հետ։ 18 տարին դեռ չլրացած Կարեն Ջհանգիրյանի հայրը՝ Արմեն Ջհանգիրյանը, «Փաստինֆո»-ին հավաստիացրել է, որ տղան լավ է, ձին՝ հետը բերել է։ Ըստ նրա՝ տղան ուշացել է մառախուղի պատճառով։
«Մի ողջ օր, ավելի ճիշտ՝ մի ամբողջ ցերեկ տևեց սպասումները։ Փառք Աստծո, ամեն ինչ նորմալ է։ Գնացել էին ձիուն փնտրելու, մառախուղ է եղել, մեր տարածքում մոլորվել են, սպասել են, մինչև մառախուղը ցրվի, կողմնորոշվել են ու եկել տուն», – ասել է հայրը։
Հիշեցնենք, որ երեկ ԱԱԾ-ն անգամ պաշտոնապես հայտնել էր, որ պատանիները հայտնվել են ադրբեջանական կողմում։
«Ստացված տվյալների համաձայն՝ ՀՀ Սյունիքի մարզի Տեղ համայնքի բնակիչներ Կարեն Արմենի Ջհանգիրյանը (ծնված 27.06.2007թ.) և Անդրեյ Արմենի Գյագունցը (ծնված 13.01.2008թ.) 2025 թվականի հունիսի 6-ին՝ ժամը 01:20-ի սահմաններում, Սյունիքի մարզի Արավուս գյուղի հարակից հատվածում տեղանքում մոլորվելու հետևանքով հայտնվել են Ադրբեջանի տարածքում։ Ձեռնարկվում են անհրաժեշտ բոլոր միջոցները՝ քաղաքացիների գտնվելու վայրը պարզելու և նրանց անվտանգ վերադարձն ապահովելու ուղղությամբ», – նշվում էր ԱԱԾ-ի հայտարարության մեջ։
Տեղի բնակիչների փոխանցմամբ՝ տղաները ձիերը որոնելու նպատակով գնացել էին արոտավայրեր, սակայն Տեղ խոշորացված համայնքի արոտավայրերի մեծ մասը հիմա համարվում է չեզոք գոտի կամ էլ գտնվում է ադրբեջանական հսկողության ներքո։ Ավելին՝ տեղեկություններ կային, որ տղաները առևանգվել են հենց պայմանական կոչվող չեզոք գոտուց։ Ավելի ուշ ՀՀ ՔԿ-ն հայտնեց, որ դեպքի առթիվ նախաձեռնվել է քրեական վարույթ՝ առևանգման հատկանիշներով։
Երեկ ուշ երեկոյան ԱԱԾ-ն հայտնեց, որ Սյունիքի մարզի Տեղ համայնքի անչափահաս բնակիչները, ովքեր մոլորվել էին, հայտնաբերվել են և այժմ գտնվում են Հայաստանի Հանրապետությունում։ Իսկ այսօր արդեն նույն ԱԱԾ-ն հայտարարեց, թե տղաների հետ զրույցի ընթացքում պարզվել է, որ ընտանի կենդանիներին փնտրելու ընթացքում նրանք մոլորվել են եւ մառախուղի պատճառով չեն կարողացել կողմնորոշվել տեղանքում։ «Ադրբեջանցիների կողմից նրանց առևանգելու մասին տեղեկատվությունը չի համապատասխանում իրականությանը», – հայտարարել է ԱԱԾ-ն՝ այդպիսով փաստացի մեղադրելով ՔԿ-ին ապատեղեկատվություն տարածելու մեջ։
Հարցին՝ արդյոք տղաներին ու նրանց հարազատներին հրահանգվել է թաքցնել իրականությունը, Արմեն Ջհանգիրյանը պատասխանել է, որ իրեն ոչ ոք չի կարող ասել՝ ինչ ասել, ինքը ասում է այն, ինչ կա. իր համար ամենակարևորը որդու ողջ և առողջ տուն վերադարձն է։
Տեղ համայնքի ղեկավար Դավիթ Ղուլուզն էլ դեպքի վերաբերյալ նախընտրում է քիչ խոսել. «Իմ խնդիրն այն էր, որ համայնքի դեռահաս բնակիչները տուն վերադառնային, այդ խնդիրը լուծվել է, մնացած հարցերով ԱԱԾ-ին ու քննչական մարմիններին դիմեք»,– ասել է նա։
Լուսանկարում՝ ադրբեջանական կողմում հայտնված տղաներն են
